कन्सासमा झन्डै एक शताब्दीपछि डेमोक्र्याटिक उम्मेदवार सिनेटर निर्वाचित

अमेरिकाको कन्सास राज्यमा झन्डै ९४ वर्षपछि डेमोक्र्याटिक पार्टीका उम्मेदवार एडम ह्यामिल्टन अमेरिकी सिनेटमा निर्वाचित भएका छन्। कडा प्रतिस्पर्धामा उनले बहालवाला रिपब्लिकन सिनेटर रोजर मार्सललाई पराजित गरेका हुन्।

रिपब्लिकन पार्टीको बलियो प्रभाव रहेको कन्सासमा सन् १९३२ यता कुनै पनि डेमोक्र्याटिक उम्मेदवारले सिनेटको सिट जित्न सकेका थिएनन्। ह्यामिल्टनको जितलाई राज्यको राजनीतिक इतिहासमा महत्त्वपूर्ण परिवर्तनका रूपमा हेरिएको छ। अमेरिकी सिनेटमा कुन दलको नियन्त्रण रहने भन्ने हिसाबले पनि यो प्रतिस्पर्धालाई महत्त्वपूर्ण मानिएको थियो।

अमेरिकाको ठूलो युनाइटेड मेथोडिस्ट चर्चका संस्थापक तथा पादरीसमेत रहेका ह्यामिल्टनले चुनावी अभियानमा धार्मिक आस्था, महँगी र सर्वसाधारणको जीवनयापनका विषयलाई प्राथमिकता दिएका थिए। कन्सासका ग्रामीण क्षेत्रमा डिजेल तथा अन्य इन्धनको मूल्यवृद्धिले कृषि र यातायात क्षेत्रमा पारेको प्रभावलाई पनि उनले चुनावी मुद्दा बनाएका थिए।

पराजित रिपब्लिकन उम्मेदवार मार्सल अमेरिकी राष्ट्रपति डोनाल्ड ट्रम्पका समर्थक हुन्। उनको चुनावी अभियानमा ट्रम्पले समेत सहभागिता जनाएका थिए। चिकित्सक पृष्ठभूमिका मार्सलले ग्रामीण स्वास्थ्य सेवा विस्तार र कृषि क्षेत्रलाई सहयोग गर्ने प्रतिबद्धता व्यक्त गरेका थिए। तर, ट्रम्प प्रशासनको बजेट कटौतीको समर्थन, महामारीका बेला मास्क अनिवार्य गर्ने नियमको विरोध र स्वास्थ्य नीतिसम्बन्धी अडानका कारण उनी आलोचनामा परेका थिए।

यसैबीच, 'द न्युयोर्क टाइम्स'ले मार्सल चिकित्सकका रूपमा कार्यरत रहँदा उपचार खर्च नतिरेको भन्दै आफ्ना करिब ७०० पूर्वबिरामीविरुद्ध मुद्दा दायर गरेको विषय सार्वजनिक गरेको थियो। उक्त विषयलाई ह्यामिल्टनको चुनावी टोलीले प्रचार अभियानमा समेत उठाएको थियो।

एसोसिएटेड प्रेसका अनुसार यो निर्वाचन कन्सास राज्यकै इतिहासमा सबैभन्दा महँगो चुनावी प्रतिस्पर्धा बनेको छ। चुनावमा करिब ११ करोड अमेरिकी डलर खर्च भएको जनाइएको छ।