घुस मुद्दामा विशेष अदालतद्वारा श्री देव यादवलाई ६ महिना कैद र ७२ हजार जरिवानाको फैसला

​काठमाडौं ।  विशेष अदालतले सेवाग्राहीसँग घुस लिएको कसुर ठहर गर्दै प्रतिवादी श्री देव यादवलाई ६ महिना कैद र ७२ हजार रूपैयाँ जरिवानाको फैसला सुनाएको छ। विशेष अदालत (इजलास नं. १) ले आज (कार्तिक १८ गते) उक्त संक्षिप्त फैसला सुनाएको हो।  
​प्रमाणबाट कसुर पुष्टि
नेपाल सरकारवादी र प्रतिवादी श्री देव यादवबीचको 'रिसवत (घुस)' सम्बन्धी मुद्दा नं. ०८२-CR-०१६० मा अदालतले ठोस प्रमाणका आधारमा फैसला गरेको हो। उजुरी निवेदक, उजुरीवाला र प्रतिवादीबीच भएको अडियो-भिडियो सम्वाद, प्रतिवादीले चलाएको गाडीबाट बरामद भएको रकम तथा अख्तियार दुरुपयोग अनुसन्धान आयोगले उजुरीकर्तालाई उपलब्ध गराएको नोटसँग बरामद रकम हुबहु मिलेको मुचुल्काबाट यादवमाथिको आरोपदाबी पूर्ण रूपमा पुष्टि भएको अदालतले ठहर गरेको छ।  
​फैसलाका मुख्य बुँदाहरू:
​कसुर ठहर: प्रतिवादी देव यादवले उजुरीवालाबाट घुस रिसवतबापत रू. ७२,०००/- (बहत्तर हजार रूपैयाँ) बुझी लिई भ्रष्टाचार निवारण ऐन, २०५४ को दफा ३(१) बमोजिमको कसुर गरेको ठहर गरिएको छ।  
​सजाय निर्धारण: प्रतिवादीको यसपूर्व फौजदारी कसुरमा सजाय पाएको नदेखिएको र प्रस्तुत मुद्दाको प्रकृतिलाई समेत मध्यनजर गर्दै सोही ऐनको दफा ३(१)(ख) बमोजिम निजलाई ६ (छ) महिना कैद र बिगो बमोजिम रू. ७२,०००/- जरिवाना हुने फैसला भएको छ।  
​क्षतिपूर्ति र रकम जफत: अपराध पीडित संरक्षण ऐन, २०७५ को दफा ४१(३) बमोजिम प्रतिवादीबाट क्षतिपूर्तिबापत थप रू. २,८८०/- असूल गरी पीडित राहत कोषमा जम्मा गर्न आदेश दिइएको छ। साथै, बरामद भएको रू. ७२,०००/- सोही ऐनको दफा ३(१क) बमोजिम जफत गरी अख्तियार दुरुपयोग अनुसन्धान आयोगलाई नै फिर्ता गरिदिने ठहर गरिएको छ।  
​अध्यक्ष माननीय श्री बासुदेव आचार्य तथा सदस्यद्वय माननीय श्री डिल्लीरत्न श्रेष्ठ र माननीय श्री विदुर कोइरालाको इजलासबाट उक्त फैसला सुनाइएको हो।